يصدف في حياتنا شخص على الاقل مصاب بهذا المرض ، وتكون مهمته الوحيده تنغيص فرحته و فرحتك حتى وان كان بدون قصد ، في كثير من المناسبات يكون فيه هذيك المرأه اللي لما تشوف الناس تضحك ومبسوطه تقول ” اكثروا من ذكر هادم اللذات ” ، او النوع الاخر اللي لما تشوف الناس مبسوطه تبدي تلقي محاضرة عن سكرات الموت او عذاب القبر ؟
التذكير بالله زين ولكن ” لكل مقام مقال ” ماينفع اروح لزواج وناس مبسوطه ببداية حياتهم الجديده واذكرهم بالموت ؟ أو اللي يشوف ان اي امر فيه سعاده يعتبر بداية فساد او الأمر ماراح ينتهي على خير وحتى في المناسبات يركز على النواقص او ينتظر حصول مصيبه .
و رهاب السعادة او “شيروفوبيا ” ينبع بالاساس من فكرة انو مابعد الفرح الا حزن وبالتالي يسعى الشخص ” لعدم الفرح ” وكأنه يشوف انو الفرح ذنب ولازم يبتعد ويبعد الناس عنه ، وفكرة هالرهاب ماتعني ان الشخص دايم حزين لا عادي تلقاه عايش حياته ولكنه يهرب من فكرة التجمعات السعيدة ، ليه ؟ لأنها تسبب له قلق وخوف من اللي بيحصل بعد الفرح .
كيف أعرف اني اعاني من هالرهاب ؟
من أكثر الامور وضوحا هي ان الشخص يربط بين الشعور بالسعادة وحدوث المصايب يعني يكون متشائم ودايم في باله السيناريو السيء وبالتالي يحاول دايم تذكير نفسه والاخرين بالسوء اللي ممكن يحدث ، ايضا تجنب المناسبات الاجتماعية والاحساس بالقلق اذا وصلته دعوه لمناسبة ما ، و على الصعيد العملي ممكن يرفض فرصة ممتازة وراح تغير في حياته تغيرات ايجابية لأنه خايف انو ممكن يصير شي سيء ، و البعض ايضا يشوف ان السعادة أمر ترفيهي ومضيعه للوقت ويحس بالعيب انه يبين انه مبسوط ويرفض المشاركة في النشاطات الترفيهيه سواء في تجمعات الاصدقاء والاهل او العمل ، واذا اضطر للحضور فلا بد انه يدخل الافكار التشاؤومية ويذكر بها الناس .
طيب ايش السبب اللي يخلي الشخص يخاف من الفرحة ؟
من الاساس اي فوبيا يعاني منها الشخص تكون بسبب تعرضه لموقف صادم في طفولته ، وبالتالي رهاب السعادة قد ينبع من المواقف اللي كان فيها الطفل يتعرض للعقاب في الاوقات اللي ينبسط فيها ، مثل اللي يطلع يلعب مع عيال الحارة ويعاقب لأنه لعب في الشارع، أو اللي يطول ماينام عشانه يتابع برنامجه المفضل فيعاقب على السهر ، او حتى اللي يجلس يخطط لطلعه او سفرة او مناسبة ويحدث فيها موقف سيء مثل الوفاة او مشكلة بين الحضور ، مثل هالمواقف تتراكم لما تخلق عند الشخص الخوف من السعادة ، واحيانا يكون لثقافة المجتمع دور كبير في خلق هذا الخوف ، ففي بعض المجتمعات تكون النظرة التشاؤمية هي السائدة عليهم ويشوفون ان الفرح عيب ومفروض ماتظهر مشاعرك السعيده بوضوح ، ولكن تبقى فكرة ربط المواقف السعيده بالعقاب هي المؤثرة بشكل اكبر على الاشخاص اللي يعانون من رهاب السعادة .
وبشكل عام مافيه كلام علمي مفصل عن هالرهاب لحد الان ولا فيه خطط علاجيه واضحه ، ولكن فيه بعض الاليات اللي تساعد على تخطيه والاستمتاع بالحياة بشكل طبيعي ومنها :
1- تعرف على نفسك ايش تحب وايش تكره .
2- فك الارتباط بين السعادة والمصايب يكون عن طريق تذكرك لمواقف سعيده حضرتها بدون مايحصل امر سيء .
3- استعمال اساليب الاسترخاء والتأمل .
4- تدريب النفس على حضور المناسبات السعيده والاستمتاع .
5- استشارة مختص نفسي .
ملاحظة :
مشاعرك هي اختيارك ، أختار صح ..
وعد المحيميد